என் குழந்தையும் குதூகலமும்

********************
அப்படி ஒரு குதூகலம்...

பேருந்தில் ஜன்னலோரமென்றால்.

கேட்கவே வேண்டாம்

இரயில் எனும்போது.

பின்..

மழை பார்த்தால்

மயில் பார்த்தால்

பட்டாசு பார்த்தால்..

பட்டாம்பூச்சி பார்த்தால்

கண்காட்சி பார்த்தால்..

கரடி பொம்மை பார்த்தால்

பலூன் பார்த்தால்..

பபூன் பார்த்தால்..

இன்னும் என்னதான் இல்லை..

என்னிலிருந்து வந்த நீ

உன்னிலிருந்து வரும்

குதூகலத்தைக்

கொஞ்சம் கொடேன்..!!

காதல் கண்ணாமூச்சி

"என்னைப் பிடிக்கவே பிடிக்காது...
என்றாய்.... உன் மீதெனக்குக்
காதல் வந்த பொழுது.
இருக்கட்டும்...
பிடித்தா சாப்பிடுகிறாய் மாத்திரையை...
காய்ச்சல் வந்த பொழுது?"

"என்னோடு பேசாதே...என்கிறாய்.
போகட்டும்..
கைகள் கோர்த்து,
நடந்தபடியாவது இருப்போம்.!!"

"பொழுது போகவில்லையென
பல்லாங்குழி விளையாடுகிறாய்...
பக்கத்து வீட்டுக் குழந்தையுடன்.
மாறாக. என்னோடு விளையாடேன்..
காதல் கண்ணாமூச்சி.!!"

"எதிர்பாராத நிமிடங்களைப்
பரிசளிக்கிறாய்....
உன் வருகைகளில்.
குழந்தையின் கையில்
திடீரெனத் திணிக்கப்பட்ட
பொம்மையைப் போல.!!"

"பயணங்கள் மிகவும் பிடிக்குமென்றேன்.
பதிலுக்கு.. எனக்கும்தான் என்றாய்.
பின் என்ன யோசனை....
நிறுத்தங்களற்ற
நம் காதல் பயணத்திற்கு.!!"

"என் காதல் உனக்குள்ளும்
வேர் விட்டது.
பிறகு வெட்கங்களாய்ப்
பூக்க ஆரம்பித்தாய்.!!"

"என் மடியில்
குழந்தையாக வேண்டும்
என்கிறாய் நீ.
எனக்கோ...
உன் பெயர் தவிர
வேறெந்தத் தாலாட்டும் தெரியாது.!!"

-த.பிரபு குமரன்

நீயும் மருதாணியும்.....

"நீ
பறிக்கும் பொழுது
வெட்கப்படும்
மருதாணி இலைகள்
பின்
உன் விரல்களில்
சிவக்கின்றன.!!"

"உன் ஒவ்வொரு விரலுக்காய்
உருட்டி உருட்டி நீ
மருதாணி இடுகிறாய்.
இருப்பினும்
தன் முறை வருவதற்குள்
ஏங்கிப் பரிதவித்துப் போகின்றன..
சும்மா இருக்கும் விரல்கள்.!!"

"நீ
மருதாணி வைத்திருந்த
நகங்களை
வெட்டிக் கொண்டிருந்தாய்.
தரையில்
குட்டிக் குட்டியாய்
கலர் பிறைகள்.!!"

'நீ ஒரு கையில்
மருதாணி இட்டு விட்டு
மறு கையில் வைக்க முடியாமல்
தவிக்கும் தருணங்களை...
எனக்குப்
பரிசளிப்பாயா?!"

"மருதாணியைப் பார்த்ததும்..
யோசிக்காமல் அழிக்கிறாய்
பார்த்துப் பார்த்து
வாங்கிப் பூசிய
நகச்சாயத்தை.!!"

"நல்லா சிவந்திருக்கா..
நல்லா சிவந்திருக்கா..
கையைக் காட்டி
எல்லோரிடமும் கேட்கிறாய்.
கண்ணாடியில் பாரேன்..
கையா, முகமா என்று.!!"

த.பிரபு குமரன்

பால்ய சிநேகிதன்

முதன்முதலாய் தெருவில் விளையாட வந்தபோதுதான்
அறிமுகம்...நண்பனாக.

எனக்கு மறுபடியும் விரல் சூப்ப
ஞாபகப்படுத்தியதே அவன் தான்.

பிற்பாடு... ஒரே வகுப்பில்..
அவன் மட்டும்தான் அழுதான்..
பொய் சொல்லியிருக்கிறேன் அம்மாவிடம். அவனும் அப்படித்தான்.

அவன் விடுப்பு எடுக்கும் நாட்களில்
எனக்கும் விடுப்புதான்....
எக்கச்சக்க அடிகளுடன்.

நாங்கள் இருவரும் கால்சட்டைகூட போடாமல்
காத்தாடி விட்டுக் கொண்டு ஓடியிருக்கிறோம்.

அய்யனார் கடை அஞ்சு பைசா அப்பளப்பூவை
அளந்து அளந்து காக்காய் கடி கடித்திருக்கிறோம்.

கமலுக்கும், ரஜினிக்குமாய் அடிக்கடி
கட்சி மாறியிருக்கிறோம்.

பெஞ்சு மேல் நிற்க வைத்த வாத்தியாரின் பேனாவை
தண்டவாளத்தில் வைத்திருக்கிறோம்.

பிடிக்காத பையனின் வீட்டுப்பாட நோட்டில்
கப்பல் செய்திருக்கிறோம்.

தேன்கூட்டில் கல் எறிந்துவிட்டு
திக்குத் தெரியாமல் ஓடியிருக்கிறோம்.

கொய்யாப்பழம்,கொடுக்காப்புளி திருடிவிட்டு
குட்டிச் சுவரேறிக் குதித்திருக்கிறோம்.

ஒளிந்து பிடித்து விளையாடிய இரவுகளில்
காட்டிக் கொடுக்காமல்,விட்டுக் கொடுத்திருக்கிறோம்.

விட்டு விட்டு எங்காவது சென்றிருந்தால்...
விளையாட்டாய் அடிக்கடி 'டூ' விட்டிருக்கிறோம்.

எங்களை 'மொட்டையும் மொட்டையும் சேந்துச்சாம்...'
என்ற பயல்களை இருவரும் சேர்ந்து மொத்தியிருக்கிறோம்.

நான் கஷ்டப்பட்டுப் பிடித்திருந்த தட்டான் பூச்சிகளை
அவன் தட்டி விட்டுப் பறக்க விட்டதற்காக
நிஜமாகவே ஓர் நாள்....
'காய்' விட்டு ஒதுங்கிக் கொண்டதென்னவோ நான் தான்.

எங்கள் அம்மாக்கள் பேசிக் கொண்டிருந்தபோதுகூட
நாங்கள் வேறு திசையை வெறித்துக் கொண்டிருந்தோம்
பெரிய மனிதர்கள் போல.

மறுபடியும் 'பழம்' விட்டுப் பேசியபோதுதான் சொன்னான்...
தாங்கள் வேறு ஊருக்குப் போகப் போவதாய்.

வெளியில் எதையாவது தொலைத்து விட்டு
வீட்டில் சொல்லாமல் திரிவது போல்...
வெறுமையுடன் திரிந்தோம்..எங்களைத் தொலைத்து விட்டு.

அவன் வீட்டிலும்..என் வீட்டிலும்
காலணி, பொம்மை, கலர் பென்சில் என்று
இடம் மாறிக் கிடந்த உடைமைகளைக்கூட
பரிமாறிக்கொள்ளவில்லை மீண்டும்.

எனக்கு அவன் அப்பாவும், அவனுக்கு என் அப்பாவும்
இந்த முறை பரிசளித்த ஞாபகார்த்த பொம்மைகளில்
சந்தோஷமில்லை.

ஆயிற்று...அவனும், அவன் அப்பா அம்மாவும்
'டாட்டா' சொல்லிவிட்டுக் கிளம்பியபோது...
சாலை வரை வந்து வழியனுப்பிய
என் அப்பா, அம்மா திரும்பி நடக்க...

நான் மட்டும் பார்த்துக் கொண்டிருந்தேன்....
அவன் போன வண்டி
புள்ளியாய் மறையும் வரை.!!

-த.பிரபு குமரன்

குமுதம் இதழில் கவிதைகள்-5/3/08

பயம்
-----
வெடித்து விடுமோ
என்ற பயத்திலேயே
பெரிதாக்குவதில்லை.....
பெரும்பாலான
பலூன்களையும்,
பிரச்சனைகளையும்.!!

கோலம்
--------
வீட்டுக்குள் கோலம்...
கலர் கோலத்தை
மிதித்து விட்டு வந்திருந்த
குழந்தைகளின் பாதங்கள்.!!

நம்பிக்கை
---------
சிகப்பு, பச்சை, மஞ்சள் என
வண்ண வண்ணமாய்
கைக்குட்டைகள் விற்கிறார்...
பார்வை தெரியாதவர்.!!

மண்
------
இளம் அப்பாவின்
இறுதிச் சடங்கில்
மண்பானை உடைக்கப்பட்டபோது
குழந்தைக்கு நினைவு வந்தது..
தன் மண் உண்டியல் காசுகளிலும்
அவர் குடித்து விட்டு வந்தது.!!


-த.பிரபு குமரன்.

உயிர் - 'குங்குமம் இதழ்'

கவிப்பேரரசு வைரமுத்து தேர்ந்தெடுத்து பரிசளித்த.....

உயிர்
-------
எப்படியென்று
தலைக்கவசம் தயாரித்துக்
கட்டாயப்படுத்துவது......
நெடுஞ்சாலைகளில்
நசுங்கிப் போகும்
பறவைகளுக்கும்,
பட்டாம்பூச்சிகளுக்கும்.?!"

-த.பிரபு குமரன்

இரயிலும் இரயில் சார்ந்த இடமும் மற்றும் மனதும்......

"ஜன்னலுக்கு வெளியே
யதார்த்தமாய் கடக்கின்றன..
ஏராளமான கவிதைகள்.
ஒரு நீண்ட தூர இரயில் பயணம்.!!"

"எங்கோ எதற்கோ நடுவழியில்,...
நள்ளிரவில் நிறுத்தப்பட்டது
இரயில் வண்டி.
மெல்ல இறங்கி..
இருட்டில் நடந்து பார்த்துவிட்டு..
மீண்டும் இரயிலேறிக் கொண்டது
மனது.!!"

"இப்போதும் உறுத்துகிறது..
வேடிக்கை பார்த்து
கையசைத்த சிறுவனுக்கு
இரயில் பெட்டியிலிருந்து
நாமும் 'டாட்டா' காட்டியிருக்கலாமோவென்று.!!"

"எப்படியேனும்
ஒவ்வொரு இரயில் பயணத்திலும்
அபாயச் சங்கிலியைப்
பிடித்து இழுத்து விடுகிறது...
மனது.!!"

"இரயிலின் ஜன்னலும்,கதவும்
இறுக மூடப்பட்ட பின்பு..
என்னவானதென்று தெரியவில்லை..
மழை.!!"

"இரயில் வண்டியோ..கூட்ஸ் வண்டியோ
அருகிருந்து பார்க்கும் போதெல்லாம்
அனிச்சையாய் தோன்றுகிறது...
ஒன்று..இரண்டு..மூன்று............"

"உடம்பை பாத்துக்கங்க..கேட்டதா சொல்லுங்க...
போன் பண்ணுங்க..மெயில் பண்ணுங்க....
கேட்டுக் கேட்டு அலுத்திருக்குமோ...
இரயிலின் ஜன்னல்கள்.!!"

"பிரிவு..ஊடல்-கூடல்..
ஆனந்தம், ஆர்ப்பாட்டம்
அனைத்தும் ஒரு சேர
அனுபவித்து விட்டு
படக்கென்று வெறிச்சோடிப் போகிறது
நடைமேடை..
ஒரு பிரதான இரயில் கிளம்புகிறது.!!"

"ஞாபகங்களை சுமந்து கொண்டு
மனிதர்களை மட்டும்
வழியனுப்புகிறது..
இரயில் நிறுத்தம்.!!"

"கூட்ஸ் வண்டியோ,
பாராமரிப்பு வண்டியோ
வரும்போது
சட்டென்று ஏமாறுகிறது..
இரயில் பார்க்கக் காத்திருந்த..
சிறு வயது.!!"

"நல்லதோ..கெட்டதோ
ஏதேனுமொன்றையாவது
ஏற்றி வருகின்றன..
தினசரிகள்..இரயில் பற்றி.!!"

"இரயிலை இங்கேயே நிறுத்தி
இறக்கி விடவா என
மிரட்டுகிறார் பரிசோதகர்....
மேல் பெர்த்திற்கு
ஏறவும், இறங்கவுமாய்
இருந்த சிறுவனை.
புன்னகைகிறாள் அம்மா.!!"

"ஒரு அதிவேக இரயில் வண்டி
மிக அருகில் கடக்கும்போது
அதிர்வதைப் போலிருந்தது மனது.
நீ நெருக்கமாக
என்னைத் தாண்டி நடந்தபோது.!!"

"சக பயணிகளோடே
இறங்கி விடுகின்றன..
பயணங்களின் போது
உதிக்கின்ற கவிதைகள்.!!"

"எங்கேயென்று தேடுவது..
மீண்டும் சந்திப்போம்
என்று கைகுலுக்கிப்
பிரிந்த..
என் இரயில் சிநேகிதர்களையெல்லாம்.!!"

"இந்த இரயில் பெரும்பாலும்
இவ்வளவு தாமதமாகது
என்று சக பயணிகளிடம்
சொல்லிக் கொண்டிருந்தனர்..
மாதா மாதம் மகன்கள்
வீட்டிற்குப் பயணிக்கும்
வயதான தம்பதிகள்.!!"

"இன்னமும் அந்த
இரயில் நிலையத்தில்
மிச்சமிருக்கும்...
ஒவ்வொரு ஜன்னலாய்
உன்னைத் தேடிய தேடல்கள்.!!"

"இரயிலில் இந்த முறை
கைக்குட்டை விற்பவரிடம்..
சென்ற பயணத்தின் போது
பேரம் பேசி
பழைய புத்தகங்கள்
வாங்கிய ஞாபகம்!"

"ஒவ்வொரு
இரயில் நிறுத்ததிலும்
ஜன்னல் வழியே கை மாறுகின்றன..
காபியும்.....காசுகளும்.!!"

"ஒற்றைத் தண்டவாளத்தைப் போன்றது...
நீ ஏற்றுக் கொள்ளாத
என் காதல்.!!

"பயணிகள் கவனிக்கவும்..வண்டி எண்........'
அறிவிப்பாளினியின் குரல்
ஒலித்துக் கொண்டிருந்தது....
இரயில் நிலையம் விட்டு
வெகு தொலைவு வந்து விட்ட
மனதுக்குள்.!!"

"ஏதேனும் பணி நிமித்தம்
அவசரமாகச் செல்லும்போது
மூடப்படும் இரயில் பாதை கதவின்
மீதான கோபம் .....இரட்டிப்பாகிறது...
தாமதமாக வந்தும், மெதுவாக உருளும்
கூட்ஸ் வண்டியைப் பார்க்கும்போது.!!"

"நானறியாமல் குறுக்கிட்டாய்
என் வாழ்க்கைப் பாதையில்.
தடம் புரண்டது மனது.!!"

-த.பிரபு குமரன்